Pas akuzave të presidentit të Shteteve të Bashkuara të Amerikës, Donald Trump, lëshuar vetëm një ditë pas takimit me kancelaren Merkel, ka ardhur i fortë reagimi i Gjermanisë.
Ka qenë ministrja e Mbrojtjes së Gjermanisë, Ursula von der Leyen, e cila cituar nga Reuters i ka hedhur poshtë pohimet e presidentit të SHBA-së, Donald Trump, se Gjermania i ka borxh shuma të mëdha parash NATO-s dhe Shteteve të Bashkuara për mbrojtjen.
“Nuk i kemi borxh NATO-s,” ka thënë Leyen, duke theksuar se është gabim që ta lidhësh vetëm me NATO-n cakun e aleancës për anëtarët që të shpenzojnë 2 përqindëshin e të hyrave të tyre ekonomike në mbrojtje deri në vitin 2024.
“Shpenzimet e mbrojtjes po ashtu shkojnë në misionet paqeruajtëse të OKB-së, në misionet tona evropiane dhe në kontributin tonë për ta luftuar ISIS-in”, – ka shtuar ajo.
Akuzat e Trump
Vetëm një ditë pasi u takua me kancelaren gjermane, Angela Merkel në Shtëpinë e Bardhë, presidenti i Shteteve të Bashkuara të Amerikës, Donald Trump ka bërë të ditur në rrjetin social “Twitter”, se Gjermania i ka borxh “shuma të mëdha parash” NATO-s dhe duhet ta paguajë SHBA-në me qëllim që t’i ofrohet më shumë siguri.
“Pavarësisht asaj që keni dëgjuar në lajmet e rreme, unë kam pasur një takim të mirë me Merkelin”, – ka shtuar presidenti amerikan, transmeton Rel.
“Përkundër kësaj, Gjermania i ka borxh shuma të mëdha parash NATO-s dhe Shteteve të Bashkuara dhe duhet të paguajë më shumë për të qenë më e fuqishme dhe një mbrojtje shumë e shtrenjtë i ofrohet Gjermanisë”, ka shkruar më tej ai.
Trump në takimin me Merkelin ka rikonfirmuar mbështetjen e fuqishme të SHBA-së për NATO-n, por po ashtu ka thënë se shtetet anëtare duhet të paguajnë pjesën e tyre të obligimeve financiare.
“Shumë shtete, në vitet e fundit kanë borxhe të mëdha dhe kjo është e padrejtë për SHBA-në”, ka thënë Trump, i cili shton se shtetet duhet të paguajnë borxhet e tyre.